FRIENDS con Robert Princic e Michele Pavan (Cantine Gradisciutta e Buse dal Lof)
HEARTS con Antico Broilo e Grilloiole (Massimo Durì e Mattia Bianchini)
LA CENA DEI RE con Matteo Bellotto
LA NOTTE DEL PIGNOLO DI MANZANO con Ronco delle Betulle
DEGUSTAZIONE DEL 25° AMARONE BERTANI 1997 VS. NEREO BRESSAN 1997

la Ostarie

La Ostarie e je il nît de Acuile eraldiche de bandiere dal Friûl, là che e siere lis alis par podê polsâ. E je une cjase dulà che la anime debile dai oms e va a scuindisi.
In dì di vuê magari si jentre te Ostarie cu la mascarute, ma culì la mascare e cole, la mascare che no cuvierç nuie, chê che o vin intor ducj fin ae tierce tace. Inte Ostarie il “cui sêstu?” al cole par lassâ il puest al “ce disistu?”, intun ecuilibri che al fâs colâ i malintindiments, e par l’Ustîr o deventìn ducj compagns, piçui e debii come lis nestris blestemiis.
La Ostarie e je teatri, là che moviments e posizions a son impuartantis, là che lis pausis a son plui impuartantis des peraulis, là che, tant che inte vite, si recite une part par podê jessi viodûts, cence paraltri jessi mai discuvierts inte proprie intimitât.
Noaltris o lin a teatri, no par viodi cualchidun a recitâ, ma parcè che il lavôr da l’atôr al è chel di ricuardânus ogni dî che o sin simpri daûr a recitâ. Al è par chel che o si sintìn malapaiâts se dal breâr o sin cjalâts cuant che o sin in platee. Al è chel stes sintiment che si prove scoltant la nestre vôs regjistrade.
L’Ustîr al è come il Minosse di Dant, che al zire la code daûr dai pecjâts e ti mande tal ziron che ti sês meretât. Ma i zîrs da l’Ustîr no son fats cu la code...
La Ostarie e jè la anime di un Friûl che al scombat la sô pôre, là che al vorès jessi cjalât par no fâ il sfuarç di spiegâsi. Cumô il timp al è sospindût.
Visìnsi, cuanche il timp al tornarà a fânus sintî i siei glons, di lâ a salvâ chel puest da l’anime che e jè la Ostarie.
Il vin al fasarâ il rest.

Matteo Bellotto